¹ וישוע שב מן הירדן מלא רוח הקדש וינהגהו הרוח המדברה׃

² וינסהו השטן ארבעים יום ולא אכל מאומה בימים ההם ואחרי אשר תמו וירעב׃

³ ויאמר אליו השטן אם בן האלהים אתה אמר אל האבן הזאת ותהי ללחם׃

⁴ ויען אתו ישוע הן כתוב כי לא על הלחם לבדו יחיה האדם כי על כל מוצא פי יהוה׃

⁵ ויעלהו השטן על הר גבה ויראהו ברגע אחד את כל ממלכות תבל׃

⁶ ויאמר אליו השטן לך אתן את כל הממשלה הזאת ואת כבודן כי נמסרה בידי ונתתיה לאשר אחפץ׃

⁷ ועתה אם תשתחוה לפני הכל יהיה לך׃

⁸ ויען ישוע ויאמר אליו סור ממני השטן כי כתוב ליהוה אלהיך תשתחוה ואתו תעבד׃

⁹ ויביאהו ירושלים ויעמידהו על פנת בית המקדש ויאמר אליו אם בן האלהים אתה התנפל מזה מטה׃

¹⁰ כי כתוב כי מלאכיו יצוה לך לשמרך׃

¹¹ וכי על כפים ישאונך פן תגף באבן רגלך׃

¹² ויען ישוע ויאמר אליו נאמר לא תנסה את יהוה אלהיך׃

¹³ וככלות השטן כל מסה וירף ממנו עד עת׃

¹⁴ וישב ישוע בגבורת הרוח אל הגליל ויצא שמעו בכל הככר׃

¹⁵ והוא היה מלמד בבתי כנסיותיהם ויהללהו כלם׃

¹⁶ ויבא אל נצרת אשר גדל שם וילך כמשפטו ביום השבת אל בית הכנסת ויקם לקרא בתורה׃

¹⁷ ויתן לו ספר ישעיה הנביא ויפתח את הספר וימצא את המקום אשר היה כתוב בו׃

¹⁸ רוח אדני עלי יען משח אתי לבשר ענוים׃

¹⁹ שלחני לחבש לנשברי לב לקרא לשבוים דרור ולעורים פקח קוח לשלח רצוצים חפשים לקרא שנת רצון ליהוה׃

²⁰ ויהי כאשר גלל את הספר וישיבהו אל החזן וישב ועיני כל אשר בבית הכנסת נשאות אליו׃

²¹ ויחל ויאמר אליהם היום נתמלא הכתוב הזה באזניכם׃

²² וכלם העידהו ותמהו על דברי חן אשר יצאו מפיהו ויאמרו הלא זה הוא בן יוסף׃

²³ ויאמר אליהם הן תאמרו לי את המשל הזה רפא רפא את עצמך וככל אשר שמענו שנעשה בכפר נחום עשה כן גם פה בעיר מולדתך׃

²⁴ ויאמר אמן אמר אני לכם כי אין נביא רצוי בארץ מולדתו׃

²⁵ ואמת אני אמר לכם אלמנות רבות היו בישראל בימי אליהו בהעצר השמים שלש שנים וששה חדשים ורעב גדול היה בכל הארץ׃

²⁶ ולא נשלח אליהו אל אחת מהנה זולתי צרפתה אשר לצידון אל אשה אלמנה׃

²⁷ ומצרעים רבים היו בישראל בימי אלישע הנביא ולא טהר אחד מהם זולתי נעמן הארמי׃

²⁸ וימלאו כל אשר בבית הכנסת חמה בשמעם את אלה׃

²⁹ ויקומו וידיחו אותו אל מחוץ לעיר ויביאהו עד גב ההר אשר נבנתה עירם עליו למען השליכו מטה׃

³⁰ אך הוא עבר בתוכם וילך לדרכו׃

³¹ וירד אל כפר נחום עיר הגליל וילמדם בשבתות׃

³² וישתוממו על תורתו כי עצום דברו׃

³³ ואיש היה בבית הכנסת ובו רוח שד טמא ויצעק בקול גדול לאמר׃

³⁴ אתה מה לנו ולך ישוע הנצרי באת להאבידנו ידעתיך מי אתה קדוש האלהים׃

³⁵ ויגער בו ישוע לאמר האלם וצא ממנו ויפילהו השד בתוכם ויצא ממנו לא הרע לו׃

³⁶ ותפל אימה על כלם וידברו איש אל רעהו לאמר מה הדבר הזה כי בשלטן ובגבורה מצוה לרוחות הטמאה והמה יצאים׃

³⁷ ושמעו הולך בכל מקמות הככר׃

³⁸ ויקם מבית הכנסת ויבא ביתה שמעון וחמות שמעון אחזתה קדחת חזקה וישאלהו בעדה׃

³⁹ ויתיצב עליה ויגער בקדחת ותרף ממנה ותקם מהרה ותשרת אתם׃

⁴⁰ וכבוא השמש הביאו אליו כל אשר להם חלים חליים שונים וירפא אותם בשומו את ידיו על כל אחד מהם׃

⁴¹ וגם שדים יצאו מרבים צעקים ואמרים אתה הוא המשיח בן האלהים ויגער בם ולא נתנם לדבר כי ידעו אשר הוא המשיח׃

⁴² ויצא וילך לו כאור הבקר אל מקום חרבה והמון העם בקשהו ויבאו עדיו ויפצרו בו לבלתי סור מהם׃

⁴³ ויאמר להם הן עלי לבשר גם לערים האחרות את בשורת מלכות האלהים כי לזאת שלחתי׃

⁴⁴ ויהי קורא בבתי הכנסיות אשר בגליל׃