¹ AKRIPA ap masani ong Paulus: Koe me saladoklar en kapakaparok ki pein uk. Paulus ap kapa wei lim a, kadededar pein i:

² I ap peren kidar maing nanmarki Akripa, me i pan kapakaparok mo ’mui ran wet duen meakan, me Sus oko pang kin ia la,

³ Pwe komui me erekilar en Sus oko ar lamalam o peipeidok kan, i ap poeki re omui, en kotin kanongama mamangi ia.

⁴ Ai wiawia kan arain maur i, me tapida Ierusalem ren sau i kan, Sus akan karos asa due.

⁵ Irail me asa ia sang mas kokodo, ma re men kadede ia, me ngai kisan pwin kelail en at lamalam, me ad a Parisär.

⁶ Ngai ari mi mon kadeik, pweki ai kaporoporeki inau o, me Kot kotiki ong sam at akan.

⁷ Nan i inau o, me at kainok eisokriau kin kaporoporeki, me re pan pwaiki ong ar nantiong kaudok ong Kot ni ran o ni pong. Maing nanmarki Akripa iei kaporopor me i pang kila ren Sus oko.

⁸ Da me komail sota kamelele, me Kot kotin kaiasada me melar akan?

⁹ Mas o i kiki ong, me i en wiada meakan, me kaokaoe mar en Iesus en Nasaret.

¹⁰ I me i pil wiadar nan Ierusalem; o me saraui kan toto me i saliedier ong nan imateng murin ai aleer manaman sang ren samero lapalap akan o irail lao kamelar, ngai pil sauasa.

¹¹ I kame irail pan pak toto nan sinakoke kan karos, o koidong ong irail, re en lalaue, o ngai lingarangar kaualap pa ’rail; i kin kame irail lel ong kanim en wai kan.

¹² A ni ai wiawia mepukat, o kokolang Damaskus ni manaman en samero lapalap,

¹³ Maing nanmarki, nin sauas i ap kilangadar nani al o marain eu sang nanlang, me lingan sang katipin, me sensereda imp ai o me iang ia kai.

¹⁴ Kit karos lao pupedier nani pwel, i ap rongadar ngil eu, katitiki ong ia ni lokaia en Ipru: Saul, Saul da me koe kamekame kin ia? Nan a pan apwal ong uk, en tametame tek o.

¹⁵ Ngai ari idok: Is komui Maing? Kaun o ap kotin masani: Ngai Iesus, me koe kin kame.

¹⁶ Koe ari paurida, kasinenda, pwe i me I pwaraki dong uk, pwen kasapwil uk ada, pwe koe en papa o saunkadede men en meakan, me koe kilangada, o meakan, me I pan kapwara dong uk.

¹⁷ O I pan dondoro sang uk ni pa en aramas akan o men liki kan me I pan kadar uk wei ong,

¹⁸ Pwen kapad pasang mas arail, pwe re en wuki sang rotorot, wuki ong marain, o sang ni manaman en Satan ong Kot, pwe re en lapwa sang dip ar akan, o ren ale ar soso ren me kamakelekele kidar poson.

¹⁹ Ari maing nanmarki Akripa, i sota sopeiki ong kasansal en nanlang o.

²⁰ Pwe mas i padaki ong toun Damaskus o Ierusalem, o sap en Iudäa kan, o men liki kan, en kalula o wuki ong Kot, o kapwaiada wan kalula mau.

²¹ Nan i me Sus akan saik ia kidi nan im en kaudok o, o re song kame ia la.

²² Ari so, en Kot a kotin ieiang ia, me i mimieki lao lel ran wet, padapadaki me tikitik o me laud akan, o sota me i inda, i eta, me saukop akan o Moses pil masanier, me pan wiaui:

²³ Ieteten, Kristus en kamekam, o me a pan men mas en me pan iasada sang ren me melar akan, o padaki ong toun wei o pil ong men liki kan duen marain o.

²⁴ A ni a kapung kila mepukat, pein i Pestus ap ngil laudeda masani: Paulus, koe iakalar! Om sukusukul toto me kapwepwe uk adar.

²⁵ A Paulus kotin masani: I sota iakalar maing isou Pestus, a i kin kida kasoi melel o pung.

²⁶ Pwe nanmarki kotin mangi duen mepukat; i me i pil aima padapadakieki ong i, pwe i asa, sota meakot, me a sota kotin ereki, pwe kaidin wasa rir, me mepukat wiauier.

²⁷ Nanmarki Akripa, komui poson saukop akan? I asa, me komui kin poson.

²⁸ Akripa ap masani ong Paulus: Me tar kis, a komui pan kainong ong ia en saulangala.

²⁹ Paulus masani: I ngongki ong Kot, me komui o karos, me rongerong ia ran wet, en dueta ngai, a iermen sal mata pot et.

³⁰ Nanmarki, o kopina, o Pernise, o me iang irail kaipokedi wasa o, ap kotida,

³¹ O kelepala, ap kapakaparok nan pung ar mamasani: Aramas men et sota kin wiada me war ong kamela de salidi.

³² Akripa ap masani ong Pestus: Aramas men et pan lapwada, ma a sota dorolang Sisa.