¹ A OL amen ad a Ananias o a paud Sapira netikila sap eu,

² Ap okisang kisan pwain a, me a paud iang asa, o wado lu en moni, pwilikidi ni aluwilu en wanporon akan.

³ A Petrus masani: Ananias menda Satan kadirela mongiong om, pwen likam ong Ngen saraui o okisang kisan pwain en sap o?

⁴ Kaidin udan om, ma a sota pan netila? O kaidin insen om ni a netilar? A menda koe inauki ong nan pein mongiong om mepukat? Kaidin aramas, me koe likam ong, pwe ong Kot.

⁵ Ananias lao rongadar masan pukat, ap pupedi mela. A karos, me rongerong mepukat, masakadar kaualap.

⁶ A manakap oko ap udar, kidim pena i, wala sang, sarepedier.

⁷ Kadekadeo murin auer silu a paud pwarado, a sota asa, me wiauier.

⁸ Petrus ap masani ong i: Katitiki ong ia, ma koma netikila sap o ni pwain wet? A sapeng: Ei i eta.

⁹ Petrus ap masani ong i: Menda koma inauki pena, en kasongesong Ngen en Kaun o? Kilang, nä en me sarepedier om paud mier mon wanim o, o re pan wa uk ala.

¹⁰ I ap madang pupedi ni aluwilu a mela. A manakap oko lao pedelong ong, rap kilangada, me a melar, re ap wala sang o sarepedi i impan a paud.

¹¹ Lomui kaualap kipadi momodisou karos, o karos me rongerong mepukat.

¹² A kilel o manaman akan toto wiauiki lim en wanporon akan nan pung en aramas akan. Irail karos kot pena nan palank en Salomo ni lamalam ta pot.

¹³ A sota amen sang ren men liki kan kak pat ong irail, pwe karos waune kin irail.

¹⁴ A me toto, me posonlar wuki ong Kaun o irail me totoia, ol o li akan.

¹⁵ Irail wala me somau kan pon al akan, pwiliki irail edi pon pet o ro akan, pwe mot en Petrus en lel ong amen irail, a lau kotido.

¹⁶ A toun kanim akan, me mi impa, pwara dong Ierusalem, wado me somau o me kalokolokki ngen saut akai, irail karos ap kelailadar.

¹⁷ A samero lapalap o karos me iang i, me pwin en sadusär, ap uda makar kida kaualap,

¹⁸ Koledi wanporon akan o ki irail la nan imateng.

¹⁹ A tounlang en Kaun o kotin ritingada wanim en imateng oko ni pong, o kotin kalua irail la liki masani:

²⁰ Komail kola sansal mon aramas, padaki ong irail nan im en kaudok duen masan kan karos en maur wet.

²¹ Irail lao rongadar met, rap sangkonai ong nan im en kaudok o kaweweda. A samero lapalap o iang oko ap kodo, eker pena kapung, o saumas en men Israel akan karos, o ilakwei ong imateng o, pwe irail en wisikedo.

²² A ladu kan lao pwarado, rap diaradar, me re solar mi nan imateng o, re ap purodo katitiki,

²³ Indada: Se diaradar imateng a ritidier mau, o pwin silepa ar uda mon wanim oko, a se lao ritingadar, sota amen me se diar lole.

²⁴ A kapin en im en kaudok, o samero lapalap akan lao rongada duen lokaia pukat, re ap ponepon kidar o sota asa, da imwin mepukat.

²⁵ Amen ap pwarado kaire kin irail: Kilang, ol oko, me komail kilang nan imateng, u nan im en kaudok, padapadaki ong aramas akan.

²⁶ Kapin iangaki ladu kai ap koieila uk irail do, a re kadek ong irail, pwe re masak aramas akan, pwe re de kate irail.

²⁷ Irail wa ir do, ap kidi ong mon kapung o, a samero lapalap idok re ’rail.

²⁸ Masani: Kit so inapwi komail edi kaualap, me komail ender kawewe ni mar wet? A kilang, komail kadire kila Ierusalem omail lamalam o, o komail kin men kapokon ong kit ntan aramas men et.

²⁹ Petrus o wanporon akan ap sapeng masani: Kitail en oke Kot mon aramas!

³⁰ Kot en sam atail akan kaiasadar Iesus, me komail kamatalar, pwe komail pasuredier i ong ni lopu eu.

³¹ Nan i me Kot kotin kasapwila kidar pali maun a, pwen Kaun o Saunkamaur, pwen kotiki ong men Israel, en kalula o lapwa pan dip akan.

³² A kit me sapwilim a saunkadede ni mepukat, pil Ngen saraui me Kot kotiki onger ren me peiki ong i.

³³ Irail lao rongadar met, re ap lingarangar kaualap o kapikapiki pena, en kame ir ala.

³⁴ Amen ap uda nan kapung o, Parisär amen ad a Kamaliel, saunkawewe amen, me masamas ren aramas karos, me masani, ren kila liki ol oko ansau kis.

³⁵ A masani ong irail: Ol en Israel komail, kalaka aramas pukat, me komail pan wia!

³⁶ Pwe ni ran tei ko Teudas udar ponmasoki, me a me lapalap, a ol impan papuki iangala i, I ari kamelar o karos, me peiki ong i, muei pasang o soredier.

³⁷ A murin ol o Iudas en Kaliläa ap uda ni ansaun wadawad o kaweid sapung aramas toto, ren tuki ong i. Ari, a pil melar o karos, me iang i, muei pasanger.

³⁸ I ap panaui komail, en sopwei sang aramas pukat, o der doke irail, pwe ma lamalam o wiawia en me ren aramas, a pan soredi,

³⁹ A ma ren Kot, komail sota kak kawe ir ala, pwe komail de kadiarokada, me kin palian Kot.

⁴⁰ Irail ari peiki ong i. Re lao ekeredo wanporon akan o woki irail, re ap inapwiedi, ren der padak ni mar en Iesus, o kadar ir ala.

⁴¹ Irail ari koiei sang ni momod en kadeik o, o peren kida, me re war ong kamekameki mar a.

⁴² A ran karos re sota dukedi sang arail kawewe nan im en kaudok o nan deu arail akan, o re padapadaki me Iesus me Kristus.