¹ OL amen mi Säsarea ad a Kornelius, me saumas en pwin en saunpei eu, me ad a men Italien,

² Me lelapok o masak Kot iangaki toun im a karos, me poden kisakis ong aramas, o kapakap ong Kot ansau karos.

³ A masani ni kasansal eu tounlang en Kot amen, me pwara dong i ni klok silu, masani ong i: Kornelius!

⁴ A kangkakil i o masakadar, potoan ong: Maing, dakot? A kotin masani ong i: Om kapakap akan o koleir leler wasailen Kot.

⁵ Koe ari kadar wong Iope ol akai, ukedo Simon, me pil ad a Petrus,

⁶ Me kin kairu ren Simon saun wia kil en man, me im a sal ong sed;

⁷ A tounlang o, me kotin mamasani ong i, lao kotilar, ap ekeredo na ladu riamen o saunpei lelapok amen, me kin mi re a ansau karos.

⁸ A lao masani ong irail mepukat karos, ap kadar ir alang Iope.

⁹ A mandan ran o ni ar sapasapalwei o koren iong kanim o, Petrus ap kotila pon im o, pwen kapakap impan klok eisokriau.

¹⁰ Ap men sakadar o a pan sak. A ni ar kaonopadang i, ap masani kasansal eu:

¹¹ A kilanger nanlang a ritidar o ed eu likamata tein pwainok kalaimun kokodi, me imwi kan pukopuk pena o pwilidi ong nani pwel.

¹² Song en man en sappa karos mi lole, me kin aluki pa, o me laualo, o man korop kai, o manpir en pan lang.

¹³ O ngil eu peidi dong i masanier: Petrus, paurida, kamela o manga!

¹⁴ A Petrus potoan ong: Kaidin Maing, pwe i kaikenta manga me mal kot, de me samin.

¹⁵ A ngil o masani ong i kariapak: Meakot, me Kot kamakelekeladar koe der mamaleki!

¹⁶ Mepukat wiauier pan silepak! Ed o ap kapuredalang nanlang.

¹⁷ A Petrus ni a kotin ponepon kidar wewe en kasansal o, me a masanier, kilang, ol oko me pakadarado sang ren Kornelius, ap rapaki im en Simon o uda pan wanim o,

¹⁸ O likilikwir pepeidok, ma Simon, me pil mar a Petrus kotikot wasa o.

¹⁹ A Petrus ni a kotin madamadaua duen kasansal o, Ngen ap kotin masani ong i: Kilang ol silimen raparapa kin uk.

²⁰ Uda o kodiwei iang irail o so peikasal, pwe Ngai me kadar irail do.

²¹ Petrus ap kodilang ren ol oko, masani: Kilang, iet ngai, me komail raparapaki. Da karepen omail kodo?

²² Irail inda: Kornelius saumas en saunpei amen, ol pung amen, me masak Kot, o kalok mau ren Sus akan karos, me mangier sang ren tounlang saraui en Kot amen, en poron dong komui, en kotido nan tanpas a, pwen mangi sang komui masan akan.

²³ I ari kasamo ir long o kinte kin irail er. A mandan ran o a kotin iang ir wei; o saulang en Iope kai pil iang i.

²⁴ A mandan ran o re leler Säsarea. A Kornelius kapokon pena sau i o kompokepa kan ap auiaui irail.

²⁵ A Petrus lao pedelong ong, Kornelius ap tu ong i o pupedi ong ni aluwilu a o kaudok ong i.

²⁶ A Petrus kauada i indada: Uda, pwe ngai pil aramas amen.

²⁷ A ni ara masan pena, ap pedelong ong, diaradar me toto momod pena.

²⁸ I ari masani ong irail: Komail asa, me a sota inen, ol en Sus amen en pat ong men liki amen de kola re a. A Kot kotin kasale ong ia, i ender mamaleki de sauteki amen aramas.

²⁹ I me i koki do o so peikasal ni ar idok ia. Ari, i men kalelapok, da karep en omail eker ia do?

³⁰ Kornelius ap masaniada: Mon pong pa pong ngai kaisesol lel auer wet. A ni klok duau i kapakap nan im ai. A kilang, ol amen me kot mo i, mi nan likau lingaling,

³¹ O masani: Kornelius, om kapakap me pwaida, o om koleir leler kupur en Kot.

³² Ari, ilakilang Iope, pwe Simon me pil ad a Petrus, en kodo. A kakairu nan im en Simon saun wia kil en man, me sal ong sed. A lao pwarado, a pan padapadaki uk.

³³ Ngai ari pitipit ilakilang komui, a meid mau omui pwarador. Ari iet kit karos sansal mon Kot, pwe sen rong meakan, me Kot masani ong komui.

³⁴ Petrus ap kotiki pasang silang i indada: Melel, i asaer, me Kot sota kin kotin lipilipiliki aramas,

³⁵ A nan sap karos meamen masak i o wiawia me pung, nan i me konekon re a.

³⁶ Masan o me a kotin kadara dong men Israel, en kaire kin irail popol ren Iesus Kristus. (Nan i me Kaun pan meakaros).

³⁷ Komail asa masan me kalok sili me tapidar nan Kaliläa lel Iudäa pon murin paptais, me Ioanes wiada padak due.

³⁸ Duen en Kot a kotin keiekier Iesus en Nasaret Ngen saraui o manaman, me kotin kakan sili wiawia mau o kakeladar me tanwar en tewil, pwe Kot kotin ieiang i.

³⁹ A kit karos me saunkadede en meakaros, me a kotin wiadar nan sap en Sus akan o pil Ierusalem, me re pasuredi ong nin tuka o kamatalar.

⁴⁰ Nan i me Kot kotin kaiasadar ni ran kasilu o kasaleda i.

⁴¹ Kaidin ong aramas karos, pwe ong saunkadede kai, me pilipildar ren Kot, kit me iang i sak o urak murin a iasadar sang ren me melar akan.

⁴² I ari masani ong kit, sen padapadak ong aramas o kadede melel, me i, me Kot kotin piladar, pwen Saunkapung pan me maur o me melar akan.

⁴³ A saukop karos kin kadede duen i, me dip en ir karos, me poson i, pan lapwada pweki mar a.

⁴⁴ A ni Petrus kotikida masan pukat Ngen saraui ap moredi pon karos, me rongerong padak o.

⁴⁵ A me poson akan, kisan sirkomsais, karos me iang Petrus pwarador, puriamuiki, me Ngen saraui pil moredi pon men liki kan.

⁴⁶ Pwe re rongadar ar lokaia kida ngil toror kapinga Kot. Petrus ap masanier:

⁴⁷ Is me pan inapwiedi pil, me mepukat ender paptaisela, pwe re aleer Ngen saraui dueta kitail?

⁴⁸ I ari masani, me ren paptaisela ni mar en Iesus Kristus. Irail ap poeki, a en mimieta re ’rail ran akai.