¹ A MURIN ran limau samero lapalap Ananias kotido iangaki saumas akai, o saunlokaia men, me ad a Tertulus; irail weiweiloke Paulus ren kopina.

² A lao wisikedo, Tertulus ap pikikidi weiweiloke i indada:

³ Kit asaer duen muein popol re omui o duen kamau toto kan ong toun wei wet, pweki omui kalangan maing Peliks. O i me se kapikapinga kin komui ansau o wasa karos.

⁴ A i sota men kapangai komui, iet eta me i poeki re omui: Komui en kotin mangi kit duen omui kalangan.

⁵ Pwe se diaradar, me ol men et me morsued o me kin kapeida Sus akan karos, me mi sappa, o i me saumas en pwin likam en Nasaret,

⁶ Me pil song kasaminela im en kaudok o, i me se koledi i, pwen kadeikada, duen at kapung o.

⁷ A monsap Lisias kotin pwarado, kotiki sang i nan pa at ki a manaman lapalap,

⁸ Masani ong me weiweiloke i, en poto dong re omui, a komui lao kalekalelapok re irail, kom pan pein mangi duen meakan, me se pang kila i.

⁹ A Sus oko pil weiweiloke Paulus indada: Mepukat melel!

¹⁰ A kopina lao olol ong Paulus, en kaparok, a ap kotin sapeng masani: Ni ai asaer, me komui saunkapung pan toun wei wet saunpar toto, i peren kida, ai pan indinda duen pein ngai.

¹¹ Pwe komui pan mangi, me pong ngaul ria pong eta, me i kodalang Ierusalem pwen kaudok.

¹² A irail sota diar ia da lokaia ong amen nan im en kaudok, de kapeida aramas oko nan sinakoke kan de nan kanim o.

¹³ O re pil sota kak kadede, me re pang kin ia la met.

¹⁴ A iet eta, me i men kadede ong komui, ni ai kin kamelele karos, me intingidier nan saukop akan o kapung o, i kin kaudoki ong Kot en sam ai kan duen tiak en ir, me re kaadaneki pwin likam.

¹⁵ O i kaporoporeki Kot me irail pil kamelele me melar akan pan maureda, me pung o me sapung kan.

¹⁶ A i me i kin sosongki pein ngai, pwe lol i en pung mon Kot o aramas akan.

¹⁷ A murin par toto i kodon wa dong toun sap wet kisakis eu o wiadar mairong.

¹⁸ I ansau, me re diar ia makelekeladar nan im en kaudok o sota weriwer de moromorong.

¹⁹ A ir pukat Sus akai nan Asien menda re sota mi met mo ’mui, kadede ngai, ma re diar me sued kot re i?

²⁰ De mepukat en pein kasansaleda sapung da, me re diar re i ni ai mi mon kapung o.

²¹ A iet eta lepen lokaia, me i kida ni ai udar nan pung ar indada: En me melar akan ar pan maureda, i pan pakadeikki ran wet re omail.

²² A Peliks lao ereki mepukat, pwe a mangi mau duen al pot et, ap kasau ir wei masani: Kaun Lisias lao kotido, i ap pan kaimwisokela omail kapung.

²³ I ap masani ong kaun en kolekol Paulus o kasaladokela i, o ender inapwiedi iang a kan, en kodon papa i.

²⁴ A murin ran akai Peliks pwarado, a paud Drusila iang i, iei li en Sus amen, ap molipedo Paulus o karonge i duen lamalam en Kristus.

²⁵ A ni a kapakaparok duen pung, o makelekel, o kadeik, me pan wiaui, Peliks ap masapwekadar o sapeng: U kowei ansau wet, i lao pisokalar, i pan eker uk do.

²⁶ A pil kaporoporeki, me Paulus pan kotiki ong i moni, pwen lapwada i; i me a purepure ekeker kido i o kasokasoi ong i.

²⁷ A murin par riau Porsius Pestus sapwiladar wiliandi Peliks. A Pelisk men konekon ren Sus oko, ap sota lapwada Paulus.