¹ IRAIL ari kotela sed o koti dong nan wein Katara;

² A lao kotidi sang nin sop, aramas me ngen saut ti poa, madang ap tang dong i sang nin sousou kan.

³ Pwe a kin kaukauson nin sousou kan, sota amen, me kak saliedi i, sal mata sota pil kak.

⁴ Pwe pan toto a salikidi sal en nä o sal mata, ari a kin kamueit pasang sal mata o sal en nä; sota amen me kak kamandala i.

⁵ Ansau karos, pong o ran, a kin mimi nan sousou kan o nana, weriwer o pein lokeki i takai.

⁶ A ni a kilang Iesus wasa doo, a ap tangalang dairukedi.

⁷ Weriwer laudeda indada: Menda re omui ngai Iesus, Sapwilim en Kot lapalap? I kaukilang komui Kot, komui ender kawairok ia!

⁸ Pwe a kotin masani ong i: Koti sang aramas en, ngen saut koe!

⁹ I ari kotin kainoma re a: Is ad om? A ap sapeng potoan ong i: Iet ad ai lekion, pwe kit me toto.

¹⁰ A ap poeki, ender kotin kaus ir ala nin sap o.

¹¹ Ari, pwin pwik kalaimun eu mimi impan nana o, mangamanga sili.

¹² Irail ap poekipoeki potoan ong: Re kotin kadar kit ala, pwe sen til ong nan pwik oko.

¹³ Iesus ari kotin mueid ong. Ngen saut akan ap koiei sang, ko ong nan pwik oko. Pwik oko ap tangedi wei ni aul ong nan sed ap mopila nan sed. Irail impan riakid.

¹⁴ Silepa kan ap tangdaui, kaireki sili nan kanim o nan sap; re ap koieila pwen kilang duen me wiaui;

¹⁵ Irail ari poto dong ren Iesus, kilang, me tanwar en tewil o a momod, o likauer, o lolekonglar; iei i me lekion mier re a. Re ap masapwekada,

¹⁶ Irail me kilanger ap indai ong irail duen me wiaui ong me tanwar en tewil o, o duen pwik akan.

¹⁷ Re ap poekipoeki, a en kotiwei sang sap arail.

¹⁸ Ni a koti dong nin sop o, me tanwar en tewil o poeki re a en iang i.

¹⁹ A i sota mueid ong i, ap masani ong i: Ko ong ni im om ren sau om, kaire kin ir duen manaman lapalap, me Kaun o wiai ong uk er o poke uk alar.

²⁰ I ari kola, kaloki sili nan Dekapolis duen manaman lapalap, me Iesus kotin wiai ong i; irail karos ap puriamui kila.

²¹ Iesus lao pil kotela sed o ong palio, pokon kalaimun eu ap ko pena re a. A kotikot pon oror.

²² Ari, saumas en sinakoke amen, me ad a Iairus kotido. Ni a tu ong i, ap dairukedi sang.

²³ Poekipoeki kaualap, potoan ong: Nai kisin seripein kis koren iong mela; i poeki, komui en kotido en pwil lim omui poa, pwen kelailada, ap pan maurela.

²⁴ I ap kotin iangala, aramas toto ap idauenla, koi dong pena.

²⁵ Li amen, me nta pwilipwil par ngaulriau.

²⁶ O lokolokki me toto ren saunwini toto o kida a kapwa karos, ap sota katepe, pwe a totorela eta.

²⁷ Ni a rongada duen Iesus, a ap dilongedo muri nan pokon o, o sair sapwilim a likau.

²⁸ Pwe a inda: Ma i sair sapwilim a likau eta, i pan kelailada.

²⁹ Ari, pwilipwil en nta madang matata. I ari pamada nan war a, me a kelada sanger somau o.

³⁰ Iesus ap madang kotin kaanda, me roson kis ko sanger. A ap saupei dong pokon o masani: Is me sair ai likau?

³¹ A sapwilim a tounpadak kan potoan ong: Komui masani, pokon et koi dong komui penaer; a komui masani: Is me sair ia?

³² I ari kotin aupwil sili, pwe a men masani, me wia me o.

³³ Li o ari masapwekada, rerer, asaer me wiaui ong i ap potodo, dairukedi mo a, potoan ong duen melel en me wiaui o.

³⁴ A ap kotin masani ong i: Nai om poson me kakelail uk adar. Ukowei popol, o kelada sang om somau!

³⁵ Ni a kotin mamasan, irail kodo sang ren saumas en sinakoke indada: Noum serepein o melar. Menda kom kangiri saunpadak en?

³⁶ Ni en Iesus a angi kair o, ap masani ong saumas en sinokoke o: Kom der masak poson eta!

³⁷ A ap sota kotin mueid ong meamen en idauenla i, Petrus eta, o Iakopus o Ioanes ri en Iakopus.

³⁸ Irail koti dong ni im en saumas en sinakoke o, ap masani arail moromorong o mamaiei kaualap.

³⁹ A ni a kotilong, a masani ong irail: Da me komail moromorongki o mamaukeki? Seri en sota melar, a mamair eta.

⁴⁰ Re ap kakaurureki i. I ari kotikiiei sang irail karos, ap kotin ukada sam o in en seri o me iang i ko; a ap pedelong ong wasa, me seri o wonon ia;

⁴¹ I ari kotin ale pa en seri o masani ong i: Talita kumi! Iet wewe: Seripein i indai ong uk, paurida!

⁴² Seripein ap madang paurida, alu; pwe a saunpar eisokriau; irail ap malamalaua kila kaualap.

⁴³ I ari kotin kalik irail edi, pwe meamen de asada, ap masani, kisin manga en ko ong.