¹ NI ran oko pil pokon kalaimunia mia, ap sota me re tungole; a ap kotin molipedo sapwilim a tounpadak kan, masani ong irail:

² I pokela pokon et, pwe re ieiang ia ran silu, ap sota ar tungol.

³ O ma I kadar ir wong ni im ar dupok, re pan lipongmas nani al, pwe akai ir kodo sang wasa doo.

⁴ A sapwilim a tounpadak kan ap sapeng potoan ong i: Ia wasa, me amen pan kak ki sang ia prot, men kamedela pokon et nan sap tan et?

⁵ A ap kotin kainoma re irail: Prot depa mi re omail? Re ap sapeng potoan ong: Me isu.

⁶ I ari kotin masani ong pokon o, en mondi ong nan pwel, ap kotikida lopon en prot isu, laolaoki, pilitiki pasang o ari, ap kotiki ong sapwilim a tounpadak kan, pwe ren nek. Irail ari nek ong pokon o.

⁷ Kisin mam kai pil mia, i ari laolaoki o masani, ren pil neki ong irail.

⁸ Irail ari manga o medier. Irail ap deuk pena kopou en maremor isu luan kamadip,

⁹ Me mangaer me koren iong pakid. A ap kotin kadar ir pasang.

¹⁰ Io sapwilim a tounpadak kan ap madang kotidang pon sop pot, kotelang nan wein Dalmanuta.

¹¹ Parisär akai ap kodo, tapiada akamai ong i, men kilang re a kilel sang nanlang, pwe re kasongesong i.

¹² A ap kotin kaangangala nan ngen i, masani: Menda di wet ngongki kilel eu? Melel I indai ong komail: Sota kilel eu pan ko ong di wet.

¹³ I ari kotila sang irail, pil pur ong nin sop o, kotilang palio.

¹⁴ Irail ap monokela prot oko, men kapinwar arail, lopon prot ta ieu mimi re rail nin sop o.

¹⁵ I ari kapung ong irail masani: Kalaka en Parisär ko ar kalap o en Erodes a kalap.

¹⁶ Irail ap lamelame nan pung arail: Sota atail prot oko.

¹⁷ Ni en Iesus a kotin mangiada, a masani ong irail: Da me komail toutouki a sota kan omail prot? Komail saikenta dedekila o weweki? Mongiong omail kapikapitakaita?

¹⁸ Mas omail mia, ap sota kilang; salong omail mia, ap sota rong. O komail sota tamataman,

¹⁹ Ni ai pilingong me limekid lopon en prot limau o, kopou en maremor depa, me komail deukada? Re ap potoan ong i: Me eisokriau.

²⁰ O isu nan pung en me pakid, kopou en maremor depa, me komail deukada? Re ap potoan: Me isu.

²¹ A ap kotin kainoma re ’rail: A da me komail sota dedeki?

²² A ap koti dong Petsaida. Re ap wa dong i maskun amen, poekipoeki en sair i.

²³ A ap kotin ale pa en me maskun o kaluala sang ni kisin kanim o; A ap likidi ong ni mas a o pwil poa lim a ko ap kainoma re a, ma a kilangada wasa de so?

²⁴ I ari sarada potoan: I kilang aramas akan likamada tuka kai, me alialu sili.

²⁵ A pil pwil pon mas a lim a ko, ap kasaradakeda. I ari kelailada ap kilangada mau.

²⁶ A ap kotin kadaralang nin im a masani: Koe depa pur wong ni kisin kanim o, o pil depa indai ong meamen nin kanim o!

²⁷ Iesus i sapwilim a tounpadak kan ap kotieila nan kanim en Säsarea Pilipi ko. Ari, ni a kotikot kowei, ap kotin kainoma ren sapwilim a tounpadak kan masani ong irail: Is me aramas inda me ngai?

²⁸ Irail sapeng i potoan ong: Ioanes saunpaptais; a akai inda, me Elias; a akai, me amen sang ren saukop akan.

²⁹ A ap kotin kainoma re irail: A komail, is me komail kin inda me ngai? Petrus ap sapeng potoan ong i: Komui Kristus!

³⁰ I ari kotin kalik irail edi, re depa indai ong meamen i.

³¹ A ap kotin tapiada kawewe kin irail, me Nain aramas en kalokolok toto o sokonekonla pan saumas akan, o samero lapalap akan, o saunkawewe kan, o pan kamela, ap pan maureda murin ran silu.

³² Masan wet a kotin masani sansal. Petrus ap ukada i tapiada kapung ong i.

³³ Iesus ap kotin saupeido aupwil sili pon sapwilim a tounpadak kan, kapung ong Petrus masani: Kola muri, Satan! Pwe om lamelam kaidin en Kot, a en aramas.

³⁴ A kotin molipedo pokon o sapwilim a tounpadak kan, a masani ong irail: Meamen pan idauen ia, en tounmeteki pein i, ap wada a lopu, idauen ia.

³⁵ Pwe meamen kanakanai maur i, pan pupe sang. A meamen kasela maur i pweki ngai o rongamau, pan dorela i.

³⁶ Pwe da me katepan aramas a aneki sappa u, ap kasela maur?

³⁷ O da me aramas pan wiliankida maur i?

³⁸ Pwe meamen namenok kin ia o ai padak kan nan pung en di en kamal o sued wed, i me Nain aramas pil pan ailaki, ni a pan kodo ni lingan en Sam a iang tounlang saraui kan.