¹ NGAI en Kaun a salidi men, kin panaui komail, pwe komail en kekeid inenweita ni koa eu, me komail paeker ong,

² Ni karakarak melel, o opampap, o kanongama, o limpok pena nan pung omail.

³ Angkelail ong wia minimin eu ni Ngen saupena ki sal en popol.

⁴ War ta ieu, o Ngen ta ieu, duen me komail paeker ong ni kaporopor ta ieu, en omail paeker ong.

⁵ Kaun ta men, poson ta ieu, paptais ta ieu,

⁶ Kot o Sam en karos me ta men me kotin poedi meakaros o daudaulole, o me kotikot lol atail karos.

⁷ A kitail karos aleer atail pai en mak duen song en kupur en Kristus.

⁸ I me a kotin masani: Ni a kotidalang poa, a kotin saliedi me salidi kan, o a kotiki ong aramas pai kan.

⁹ A iaduen, ma a kotidalang poa, kaidin a pil so kotidilar pa sed, wasa lolia mas o?

¹⁰ Me kotidila, i ota, me kotida wei ileila sang nanlang kan karos, pwen kadirela wasa karos.

¹¹ O a kotin kasapwilada akai, en wanporon akan o akai en saukop akan, o akai en warongamau kan, o akai en silepa o saunpadak kan.

¹² Pwen kapungala saraui kan ong wiawia dodok eu, me pan kauada war en Kristus.

¹³ Kitail karos lao lel ong poson ta ieu, o lolekong ki Sapwilim en Kot, o wiala ol melel, me paroki ong Kristus ni a unsokela,

¹⁴ Pwe kitail en solar tau en seri pwelel, me mokimokideki sili padak likam, me kin pwai kida kotaue en aramas akan o ar likam, o widiwiding me re kin wiada, pwen kaweid sapung.

¹⁵ A kitail en melel ni limpok, ap kakairida ni song karos ong Kristus, me tapwi o.

¹⁶ Me war pon kakauda sang o kokon akan karos katengeteng pena ia; a kokon pukat papa pena, duen dodok en kokon akan eu eu, duen ar itar ong, iduen war o kin kakairida o maular ni limpok.

¹⁷ I me i indai ong komail o kadede kila Kaun o, me komail ender weweid dueta men liki kan kin wia ni aklapalap en ngen ir.

¹⁸ Me ngen arail rotorotalar, o re sang maur en Kot, pweki ar sololekong me mi lol arail o pweki mongiong arail kapitakailar.

¹⁹ Me solar pam wasa, ap mueid ong pein irail, en dender o inong iong kapwaiada song en saut akan karos.

²⁰ A kaidin iduen, me komail asadar ren Kristus.

²¹ Ma komail ronger duen i o padakki i, me tiak melel mi ren Iesus.

²² Komail ari muei sang tiak en mas o aramas maring, me kin kawe kila pein i inong sued.

²³ A komail en kawilikapada ngen omail!

²⁴ O danwar anekila aramas kap, me wiauier duen kupur en Kot, ni melel o pung o saraui.

²⁵ I me komail en kasela likam amen amen ap lokaia melel ong men impa, pwe kitail sau ta ieu.

²⁶ Ni makar komail der wia dip, o katipin der kirila mon omail insenemaula.

²⁷ Ender duki ong tewil o!

²⁸ Me pirap, ender pur ong pirap, a mak eta, en dodok, kadokeki pa kan dipisou mau, pwen kaonop da kisakis ong me samama kan.

²⁹ Kasoi saut ender ko wei sang nan au omail, a men kamau, pwen papaki ong me karong akan me mau.

³⁰ Komail der kamauke Ngen saraui en Kot, me komail kilelekier ong ran en kasapaledo!

³¹ A limelimek sued, o lingarangar, o makar, o men pei, o lalaue en doo wei sang komail, o pil song en sued karos.

³² A komail en kadek pena, o poka pena, o mak pena amen amen, dueta Kot kotin maki ong komail ren Kristus.