¹ ¶ Nau taim ol i bin wokabaut long Amfipolis na Apolonia, ol i kam long Tesalonaika, we i gat wanpela sinagog bilong ol Ju.

² Na Pol, olsem em i kastam bilong em, i go insait long ol, na tripela de sabat em i wok long stretim tok wantaim ol wantaim rait bilong God,

³ Taim em i opim na soim tingting, long Kraist i mas i gat nid long karim pen, na kirap bek gen long dai. Na long dispela Jisas, husat mi autim long yupela, em Kraist.

⁴ Na sampela bilong ol i bilip, na poroman wantaim Pol na Sailas, na bilong ol Grik i strong long bihainim lotu wanpela traipela lain tru, na bilong ol nambawan meri i no liklik lain.

⁵ Tasol ol Ju husat i no bilip, taim mangal tingting i muvim ol, i kisim sampela pamuk rot man bilong ol kain man nating, na bungim wanpela lain, na kirapim bikpela paul nabaut long dispela biktaun olgeta, na ol i paitim hauslain bilong Jeson, na painim rot long bringim ol ausait i go long ol manmeri.

⁶ Na taim ol i no lukim ol, ol i pulim Jeson na sampela brata i go long ol hetman bilong biktaun, na singaut, Ol dispela man husat i bin tanim dispela graun antap long het bilong en i kam hia tu,

⁷ Husat Jeson i bin kisim. Na ol dispela olgeta i mekim pasin i birua long ol strongpela tokaut bilong Sisar, taim ol i toktok long i gat narapela king, wanpela Jisas.

⁸ Na ol i givim wari long ol manmeri na ol hetman bilong biktaun, taim ol i harim ol dispela samting.

⁹ Na taim ol i bin kisim mak bilong tok promis long Jeson, na bilong arapela, ol i larim ol i go.

¹⁰ ¶ Na wantu ol brata i salim Pol na Sailas i go long nait i go long Beria, husat taim ol i kam long dispela hap i go insait long sinagog bilong ol Ju.

¹¹ Ol dispela i bikman moa long ol dispela long Tesalonaika, long dispela, ol i kisim tok wantaim olgeta pasin redi bilong tingting, na ol i painim tru long rait bilong God olgeta wan wan de, long ol dispela samting i tru o nogat.

¹² Olsem na planti bilong ol i bilip. Na tu bilong ol meri i gat ona husat i bilong ol Grik, na bilong ol man, i no liklik lain.

¹³ Tasol taim ol Ju bilong Tesalonaika i bin kisim save long Pol i autim tok bilong God long Beria, ol i kam long dispela hap tu, na kirapim ol manmeri.

¹⁴ Na nau wantu ol brata i salim Pol i go samting olsem em i go long biksi. Tasol Sailas na Timotias i stap yet long dispela hap.

¹⁵ Na ol i husat i bringim Pol i bringim em long Atens. Na taim ol i kisim wanpela tok strong i go long Sailas na Timotias long kam long em wantaim olgeta hariap, ol i go.

¹⁶ ¶ Nau taim Pol i wetim ol long Atens, spirit bilong em i kirap insait long em, taim em i lukim dispela biktaun olgeta i givim ol yet long lotuim ol piksa bilong god giaman.

¹⁷ Olsem na em i tok pait insait long sinagog wantaim ol Ju, na wantaim ol man i strong long bihainim lotu, na long maket olgeta wan wan de wantaim ol husat i bung wantaim em.

¹⁸ Nau sampela saveman bilong man bilong ol lain Epikurian, na ol lain Stoik, i bungim em. Na sampela i tok, Dispela man bilong tok nating bai tok wanem? Sampela arapela i tok, I luk olsem em i man bilong putim ples klia ol narakain god. Bilong wanem, em i autim tok long ol long Jisas, na kirap bek long dai.

¹⁹ Na ol i kisim em, na bringim em i go long Areopagas, i spik, Inap long mipela i ken save long dispela nupela skul, we yu toktok long en, em wanem?

²⁰ Long wanem, yu bringim sampela narakain samting i kam long ol ia bilong mipela. Olsem na mipela i gat laik long save long ol dispela samting i gat wanem mining.

²¹ (Long wanem, olgeta man bilong Atens na ol ausait man husat i stap long dispela hap i no yusim taim bilong ol long wanpela narapela samting, nogat, long tokaut o long harim sampela nupela samting tasol.)

²² ¶ Nau Pol i sanap insait long namel bilong liklik maunten Mars, na tok, Yupela ol man bilong Atens, mi kisim save long insait long olgeta samting, yupela i gat ol kain kain bilip nating tumas.

²³ Long wanem, taim mi wokabaut klostu, na lukim ol lotu samting bilong yupela, mi lukim wanpela alta wantaim dispela rait, I GO LONG GOD MIPELA I NO SAVE. Olsem na em husat yupela i no klia na lotu, mi tokaut long yupela long em.

²⁴ God husat i wokim dispela graun na olgeta samting i stap insait long en, taim yumi luksave olsem em i Bikpela bilong heven na dispela graun, i no stap insait long ol tempel ol han i wokim.

²⁵ Na tu ol han bilong man i no inap long lotuim em, olsem em i gat nid long wanpela samting, taim yumi luksave long em i givim laip long olgeta, na win, na olgeta samting.

²⁶ Na em i bin wokim long wanpela blut olgeta kantri bilong ol man bilong stap long olgeta hap bilong pes bilong dispela graun, na em i bin pasim tok long em yet long ol taim bipo em i bin makim, na long ol hap arere bilong ol bilong stap.

²⁷ Inap long ol i ken painim Bikpela, sapos i ken kamap long ol i ken pilim i bihainim em, na painim em pinis, maski em i no stap longwe long olgeta wan wan bilong yumi.

²⁸ Long wanem, insait long em yumi stap laip, na muv, na gat laip bilong yumi. Olsem sampela tu bilong ol man bilong raitim poem bilong yupela i bin tok, Long wanem, yumi tu i kamaut long em.

²⁹ Bikos nau yumi kamaut long God, yumi no ken ting olsem dispela God Olgeta em i wankain olsem gol, o silva, o ston, dispela man i sapim long save samting na plen bilong man.

³⁰ Na ol dispela taim bilong ol man i no klia God i no tingting tumas long en. Tasol nau em i tok strong long olgeta man long olgeta wan wan hap long ol i mas tanim bel.

³¹ Bilong wanem, em i bin makim wanpela de, insait long dispela em bai jasim dispela graun long stretpela pasin long dispela man husat em i bin makim. We em i bin givim strongpela bilip long olgeta man long en, long dispela, em i bin kirapim em long dai.

³² ¶ Na taim ol i harim stori long kirap bek long dai, sampela i wokim pani bilong daunim. Na ol arapela i tok, Mipela i gat laik long harim yu gen long dispela samting.

³³ Olsem na Pol i lusim hap i namel long ol.

³⁴ Tasol sampela man i holimpas em strong, na bilip. Namel long husat em man Areopagas Daionisias, na wanpela meri husat nem bilong em em Damaris, na ol arapela wantaim ol.