¹ PARISÄR o saunkawewe kan ap ko dong i sang Ierusalem, kalelapok re a:

² Menda sapwilim omui tounpadak kan tiakedi padok en kaua ko? Pwe re sota kin omiom ni ar pan kang prot.

³ A i kotin sapeng masani ong irail: Menda komail pil tiakedi kusoned en Kot pweki omailpadok kan?

⁴ Pwe Kot kotin kusonedadar masanier: Kakaki sam om o in om, o meamen lalaue sam a de in a, i en kamela.

⁵ A komail kin inda: Meamen indang sam a o in a: Korpan, iet wewe: Mairong eu, me koe men aneki sang ia; komail inda, dene sota dip a; i ari sota pan kakaki sam a o in a.

⁶ Iduen omail tiakedi kusoned en Kot pweki omail padok kan.

⁷ Malaun akan komail, nan melel, me Iesaia kokopadar iran komail, ni a masani:

⁸ Aramas pukat kin kaka kin ia au arail, a mongiong arail me doo sang ia;

⁹ Ari, me mal ar kaudok ia, pwe kusoned en aramas eta, me re kin kaukawewe.

¹⁰ I ari molipe pena aramas akan masani ong irail: Rong o weweki!

¹¹ Kaidin me kin ko ong nan aua kin kasaminela aramas, a me kin ko sang nan aua, i me kin kasaminela aramas.

¹² Tounpadak kan ap kodo, potoan ong i: Re kotin mangi, me Parisär akan makar kida ni ar rongadar masan o?

¹³ A kotin sapeng masani: Tuka karos, me kaidin Sam ai nanlang, padukedier, pan weiweida.

¹⁴ Puei sang irail; irail me maskun, ap kalua me maskun akan. A ma me maskun amen pan kalua me maskun, nan ira karos pan pupedi ong nan por o.

¹⁵ Petrus ap sapeng potoan ong i: Re kotin kawewe ong kit karaseras pot et.

¹⁶ I ari kotin masani: Komail pil sota lolekong?

¹⁷ Komail saikenta weweki, meakaros, me kin ko ong nan aua kin kodilong ong nan kaped o ap kin kasapokela?

¹⁸ A me kin ko sang nan aua, kin tapida sang nan mongiong, o i me kin kasaminela aramas.

¹⁹ Pwe sang nan mongiong o lamelam sued kin tapi sang ia: Kamela aramas, o kamal, o nenek, o pirap, o kadede likam, o lalaue.

²⁰ Song pukat, me kin kasaminela aramas. A so omiom ap manga sota kin kasaminela aramas.

²¹ Iesus ap kotila sang wasa o, kotilang wein Tirus o Sidon.

²² A kilang, li en Kanaan amen, me kodo sang wasa o, likelikwir ong i, potoan ong: Kupura ia! Maing, ir me sapwilim en Dawid! Nai sereipein waiwairokki tewil.

²³ A a sota kotin sapeng i meakot. Sapwilim a tounpadak kan ap kai dong i poeki re a potoan ong: Re kotin kadarala i, pwe a kin likelikwir dong kitail.

²⁴ A kotin sapeng masani: Sota me I pakadara dong, pwin sip en saun Israel eta, me salongalar.

²⁵ A a kodo, poridi ong i potoan ong: Maing, re kotin kupura ia!

²⁶ A kotin sapeng masani: A sota mau, en ale en seri ar tungol prot ap kasedi ong ren kisin kidi kan.

²⁷ A potoan ong: Melel Maing, ari so, kisin kidi kan kin namenam maremor akan, me kin pupedi sang ni tepel en ar saumas.

²⁸ Iesus ap kotin sapeng masani ong i: O li, om poson mo laud! A pan wiaui ong uk duen me koe inong iong. Na seripein ap kelailadar ni auer ota.

²⁹ Iesus ari kotila sang wasa o, koti dong liman sed en Kaliläa, a lao kotida pon dol eu ap kaipokedi wasa o.

³⁰ O pokon kalaimun pokon dong i, me wado me dangidang kai, o me maskun, o me lotong, o me sikilikil, o song toto, ap pwilikidi ni aluwilua. A ap kotin kakelail ir ada.

³¹ Pokon o ap puriamuiki ni ar kilang, me lotong akan lokolokaia, o me sikilikil akan kelailadar, o me dangidang kan alialu, o me maskun akan kilang wasa; rap kapinga Kot en Israel.

³² Iesus lao molipe pena sapwilim a tounpadak kan a kotin masani: I ap pokela pokon en, pwe re mi re i ran silu ap sota kan ar manga, a I sota pan kadar ir ala ni ar sota mangaer, pwe ren der dupokala pon al o.

³³ Sapwilim a tounpadak kan ap potoan ong i: Se pan kisang ia prot toto, men kamedela pokon et nan sap tan wet?

³⁴ Iesus kotin masani ong irail: Lopon en prot me depa mi re omail? Irail potoan ong: Me isu o kisin mam kis.

³⁵ I ari kotin masani ong pokon o, en mondi ong nan pwel o,

³⁶ Ap kotikidar lopon en prot isu o kisin mam akai, laolaoki, pwilitiki pasang o kotiki ong sapwilim a tounpadak kan, a tounpadak kan ap nek ong pokon o.

³⁷ Irail karos ari mangaer, o medier; irail ap deuk pena kopou isu luan kamadip o.

³⁸ A irail, me mangaer, me ol pakid, a li o seri kan sota iang wadawader.

³⁹ A lao kotin kadar pasang pokon o, a kotilang pon sop pot, koti dong impan Maktala.