¹ I DOKAN nanmarki Erodes ronger duen wiawia en Iesus.

² Ap masani ong sapwilim a ladu kan: Nan i Ioanes saunpaptais, a mauredar sang ren me melar akan, i me a wia kida manaman pukat.

³ Pwe Erodes koledier Ioanes o saliedier ong nan imateng pweki Erodias en ri a Pilip a paud.

⁴ Pwe Ioanes me masani ong i: A sota muei ong komui en ale i.

⁵ O a men kamela i, a a masak aramas akan, pwe re wiakin i saukop amen.

⁶ A en Erodes a ran en ipwidi wiauier, nain Erodias seripein ap kakalek mo ’rail, i me Erodes peren kidar.

⁷ I ari inauki ong i, me a pan ki ong i, meakaros, me a pan poeki, ap kotin kaula,

⁸ A lao pwili sang in a, ap potoan ong: Kotiki dong ia mongan Ioanes saunpaptais pon dal wet.

⁹ Nanmarki ap kupur suedelar; a pweki a kaula o pweki irail, me iang i kot ni tepel o, a masani ren ki ong i.

¹⁰ I ari poronelar en lepuk sang mangan Ioanes nan imateng.

¹¹ Monga ap wisikedor pon dal eu, ap pangalang seripein o, i ap wala ren in a.

¹² A tounpadak kan ap pwarador, ale kalep a, sarepedier, rap kola kaireki Iesus.

¹³ Iesus lao mangi mepukat, ap kotin iangalar sop pot, kotilang sap tan eu. Pokon lao rongadar, rap idauenla i sapasapal sang nan kanim akan.

¹⁴ A lao kotila sang wasa o, ap kotin masani pokon kalaimun, ap kupuro kin ir ala, o kotin kakelada, me somau re ’rail.

¹⁵ A lao sautik penaer sapwilim a tounpadak kan kaidong i potoan ong: Sap tan eu met o ansau daulier; re kotin kadar pasang pokon o, pwe ren kola nan kanim akan, netiada kang ar manga.

¹⁶ A Iesus kotin masani ong irail: Sota kare pan ar kola, komail pan katungole irail.

¹⁷ A irail potoan ong i: Sota at tungol met, lopon en prot eta limau o mam eta riamen.

¹⁸ A a kotin masani: Wa dong ia!

¹⁹ A ap kotin masani, pokon en mondi nan ra, ap kotikida lopon en prot limau o mam riamen, ap kotin masanda nanlang, laolaoki pilitiki pasang o kotiki ong tounpadak kan lopon en prot oko a tounpadak kan ap nek ong pokon o.

²⁰ Irail karos ari manga o medier; rap deuk pena kopou en maremor eisok riau luan kamadip o.

²¹ A irail, me mangaer, me ol limekid a li o seri kan sota iang wadawader.

²² A ap kotin pain tounpadak kan, ren keredi pon sop pot, pwe ren madangwei mo a lel palio, lao a pan kotin kadar pasang pokon o.

²³ A lao kotin kadar pasang ponkon o, ap kotin kelepelar pon nana eu, pwen laolao. A lao, sautik penaer i eta, me kotikot wasa o.

²⁴ A sop o mi ni ailepan sed o lusiluseki iluk kan pwe ang udo sang moa.

²⁵ A kadekadeo nan lukepan pong Iesus ap kotikot ko dong irail pon sed o.

²⁶ A tounpadak kan lao kilanger i kotikot sili pon sed o, ap masapwekadar indada: Ani amen! Irail ap weriwer pweki ar masak.

²⁷ A Iesus kotin madang kasoi ong irail masani: Kaporopor mau, pwe Ngai met, der masak!

²⁸ A Petrus sapeng i patoan ong: Maing, ma ir, re kotin masan dong ia, i en kowei re ir pon pil o.

²⁹ A ap kotin masani: Ukedo! Petrus ap keredier sang nan sop o, weweid pon pil o, pwen kola ren Iesus.

³⁰ A lau kilanger ang ma, ap masapwekadar, a ni a pan kirila, a weriwer indada: Maing kupwura ia!

³¹ Iesus kotin madang kapawei lim a koledi i, masani ong i: O koe meid poson tikitik, da me koe so posonki?

³² Ira lao kotidar pon sop o ang ap moledier.

³³ A toun sop o ap kaiong i, poridier potoan ong: Melel ir me Sapwilim en Kot!

³⁴ Irail lao kotin kotela, rap kotilang sap Kenesaret.

³⁵ Toun sap o lao asa i, rap kadar sili wasa karos, o re wa dong i me somau kan karos,

³⁶ O poeki re a, ren potoan sair ta imwin sapwilim a likau. A karos, me sair i kelailadar melel.