¹ KOMAIL kalaka, pwe komail der kisakis sansal mon aramas, pwe ren udial; pwe ede sota pwain omail ren Sam omail, me kotikot nanlang.

² Ari, koe lao kisakis, ede peuk saui mo om, duen me malaun akan kin wia nan sinakoke kan o nani al akan, pwe ren indand ren aramas. Melel I indai ong komail, re aleer arail pwain.

³ A koe lao kisakis, der kasale ong pali maing om, me pali maun om kin wiada.

⁴ Pwe om kisakis en rir; a Sam om, me kin masani wasa rir, pan kotin katingi uk.

⁵ Koe lao wia kapakap, koe der ras ong me malaun akan, pwe re men kapakap nan sinakoke kan, o nani al akan, pwe ren sansal mon aramas. Melel I indai ong komail, re aleer arail pwain.

⁶ A koe lao wia kapakap, ko ong nan om pera, a koe lao ritingidier wanim o, ap kapakap ong Sam om, me kotikot wasa rir, a Sam om, me kin masani wasa rir, pan kotin katingi uk.

⁷ Komail lao kapakap, komail depa purepur ong lokaia mal, duen men liki kan, pwe re kiki ong, me re pan pwaikida ar lokaia toto.

⁸ Komail ari ender dueta irail, pwe Sam omail kotin mangi meakan, me mau ong komail, mon omail poeki re a.

⁹ A iet duen omail pan wia kapakap: Sam at, me kotikot nanlang. Mar omui en saraui.

¹⁰ Wei omui en pwaida. Kupur omui en wiaui sappa dueta nanlang.

¹¹ Kotikido ran wet at tungol kaukaule.

¹² Lapwa sang kit dip at, dueta kit me kin lapwada koros, me wia dipi ong kit.

¹³ Eder kaluang kit ren me katikatiamau kan, a nekid kit sang ni me sued akan,

¹⁴ Pwe ma komail pan makeki ong aramas dip ar akan, Sam omail nanlang pan pil makeki ong komail.

¹⁵ A ma komail sota pan makeki ong aramas dip ar akan, nan Sam omail sota pil pan makeki ong komail dip omail akan.

¹⁶ Komail lao kaisesol, eder mas en sang duen me malaun akan, pwe re kin kawukila mas arail, pwe aramas en kilang arail kaisesol. Melel I indai ong komail, re aleer arial pwain.

¹⁷ A koe lao kaisesol, usor mong om o opinok.

¹⁸ Pwe koe dor kasale ong aramas om kaisesol, a ong Sam om, mi kotikot wasa rir, a Sam om, me kin masani nan wasa rir, pan kotin katingi uk.

¹⁹ Komail der ki pena omail pai kan nin sappa, wasa man en mot o mir pan kawela ia, o men pirap kin weirada o pirapala.

²⁰ A komail ki pena omail pai kan nanlang, wasa man en mot de mir sota pan kawela, o men pirap sota kin weirada de pirapala.

²¹ Pwe wasa om pai mia ia, iei wasa mongiong om kin pil mia ia.

²² Por en mas iei marain en pali war. Ari, ma mas om makelekel, war om karos pan dir eng marain;

²³ A ma mas om me sued, war om karos pan dir en rotorot. A ma marain, me mi lol om, pan rotorot, daduen wan rotorot!

²⁴ Sota amen me pan kak papa saumas riamen, pwe a pan kailongki amen, ap pok ong me teio, de a pan kasampwaleki amen, ap mamaleki me teio. Komail sota pan kak papa Kot o mamon.

²⁵ I me I indaiki ong komail: Eder ngongongki ong maur omail, me komail pan kang o me komail pan nim, pil sota ong war omail, me komail pan likau kida. Pwe maur so kasampwal sang kisin manga, o pali war sang likau?

²⁶ Kalelapok ong manpir pan lang; re sote, kin kamoredi, re soin kin dolung, re sota kin nak pena; ari so, Sam omail nanlang kotin kamakamanga irail; a ia duen, komail so kasampwal sang irail?

²⁷ A is nan pung omail, ni a ngongki, me pan kak use pasang pein i ki tipong en pa eu?

²⁸ O menda komail ngongki likau? Kalelapok ong kiop akan, me mi nan sap, duen ar kakairida. Re sota kin dodok o sota monkol pena.

²⁹ A I indai ong komail: Nan Salomo ni a lingan karos sota a likau dueta apot irail.

³⁰ Ari, ma iduen Kot kotin kapwataki dip, me mi nan sap, me kin mi ran wet, a lakap pan lokidokila nan kisiniai, dadue a sota pan kotin kalikauwi komail da, me poson tikitik?

³¹ I me komail der ngongongki moinda: Da me se pan kang? De da me se pan nim? De da me se pan likau kida?

³² Pwe mepukat men liki kan kin raparapaki; pwe Sam omail nanlang kotin mangi, me mepukat karos mau ong komail.

³³ Rapaki mas wein Kot o a pung, a mepukat karos pan pouselang komail.

³⁴ Eder ngongki ong lakap; pwe lakap pan ngongki ong pein i; a itar ong ran eu pein a sued.