¹ IESUS ap kotila kotiwei sang nan im en kaudok o, sapwilim a tounpadak kan ari poto dong i, pwen kasansale ong i im en kaudok o.

² Iesus ari kotin sapeng masani ong irail: Komail so ududial mepukat karos? Melel I indai ong komail, sota eu takai pan mimi pon eu, me sota pan karongk pasang.

³ Ni a kotin kaipokedi pon dol Oliwe, tounpadak kan kelep poto dong i potoan ong: Re kotin masan dong kit ansau da, me mepukat pan pwaida o da kilel pan ar pan kotin puredo, o imwin kaua?

⁴ Iesus ari kotin sapeng masani ong irail: Kalaka, pwe sota amen en kotaue komail.

⁵ Pwe me toto pan kodo ni ad ai katiti: Ngai me Kristus o kotaue me toto.

⁶ Komail pan rongada duen mauin o kasokasoi pan mauin; Komail kalake, der masak; pwe mepukat pan wiaui mas, a imwi saikenta mia.

⁷ Pwe eu sap pan u ong eu, o eu wei ong eu; o ansaun lek, o kilitop, o rerer en sap akai pan wiaui.

⁸ Mepukat karos tapin kalokolok.

⁹ Irail ap pan pang komail lang kamakam o kame komail la; o komail pan tantat pan kainok karos pweki ad ai.

¹⁰ Me toto ap pan makarada, o amen pan pangala amen, o re pan tataki nan pung arail.

¹¹ O saukop likam toto pan pwarada o kotaue me toto.

¹² A limpok en me toto pan laula, aki sapung, me pan pwaida kaualap.

¹³ A me pan dadaurata lel imwi, i pan dorela.

¹⁴ A rongamau en wei o pan kalok sili nan sappa karos, pwen kadede ong wei karos, iei ansau, me imwi korendo.

¹⁵ A komail lao kilang saut akan, o ola laud mi nan wasa saraui, duen me saukop Daniel kopadar, meamen doropwe, i en weweki.

¹⁶ Me kin mi nan sap en Iudäa, ap tangala pon nana;

¹⁷ O me mi pon im, ender ko ong lole, pwen ale a kapwa sang;

¹⁸ O me mimi nan sap, ender purong ale a likau.

¹⁹ O me suedi ong irail me lisean o me kin kadidi ni ran oko!

²⁰ Komail ari kapakap, pwe komail depa pitila ni ansaun kapau, o pil der ni ran en sapat.

²¹ Pwe i ansaun kamakam kaualap, sota me dueta sang ni tapin kaua kokodo lel met, pil sota pan wiaui kokolata.

²² O ma ran oko so kamalaulau la, sota uduk eu me pan dorela; a pweki me piladar akan ran oko pan kamalaulaula.

²³ O ma meamen pan indang komail: Kilang iet Kristus de monen, komail der kamelele.

²⁴ Pwe Kristus likam kai o saukop likam kai pan pwarada, o kapwareda kilel o manaman akan, pwen pil kotaueda me piladar akan, ma re kak ong.

²⁵ Kilang, ngai me kop ong komail er.

²⁶ Ari, ma re pan katiti ong komail: Kilang, a kotikot nan sap tan o, der koieila; kilang, a kotikot wasa rir o, der kamelele.

²⁷ Pwe duen liol a tapida sang ni mas en lang linganla lel kapin lang, iduen en Nain aramas a pan pwarado.

²⁸ Pwe wasa man melar mia ia, i wasa ikel pan pokon pena ia.

²⁹ A murin kamakam o katipin pan madang rotorotala o maram pan solar lingan, o usu kan pan moredi sang nanlang, o kateng pan nanlang pan mokidada.

³⁰ Kadapakilene pan Nain aramas ap pan pwarada nanlang, o kainok karos en sappa ap pan mamaiei, o irail pan kilang Nain aramas a kokido dapok en lang akan, me manaman o lingan kaualap.

³¹ O a pan kadarala na tounlang kan peuk posaune lapalap, re pan kapokon pena na me piladar akan sang pali paieu, sang ni mas en lang lel ong kapi.

³² Sang ni tuka pik o komail padakki karaseras en: Ra kan lao pilen o ta pwarada, komail asaki, me rak korendor.

³³ Pil dueta komail, komail lao diar mepukat, en asa, me a korendor, a leler liman wanim.

³⁴ Melel I indai ong komail, di wet sota pan mela, lao mepukat karos pan pwaida.

³⁵ Lang o sappa pan poula, a ai padak sota pan poula.

³⁶ A duen ran o auer sota amen, me asa, pil tounlang kan sasa. Sam ai ta me mangi.

³⁷ A duen ni muein Noa iduen en Nain aramas a pan pwarado.

³⁸ Pwe duen ni ran akan mon nolik lapalap re manga o nim, re papaud o kapapaud, lao lel ran en Noa a pedelong ong nan warim o.

³⁹ O re sota dedeki lao lel nolik pwaida o kamop ir ala karos, iduen en Nain aramas a pan pwarado.

⁴⁰ I ran o riamen pan mi nan sap; amen pan peuka sang o amen luadi.

⁴¹ Riamen pan iris nan im en plaua, amen pan peuka sang a amen luadi.

⁴² Komail ari masamasan, pwe komail sasa auer, me omail Kaun pan pwarado.

⁴³ A met komail en asa, ma saumas en im o asaer auer en men lipirap pan kodo, a pan masamasan, a sota pan mueid ong kawela im a.

⁴⁴ Komail ari pil masamasan, pwe Nain aramas pan kodo ni auer, me komail sota lamelame.

⁴⁵ Ari, is ladu lelapok o lolekong o, me a monsap kasapwilada pon im a, pwen nene ong irail ni ansau me kon ong.

⁴⁶ Ladu o meid pai, me a monsap pwara diarada i a wiawia due met!

⁴⁷ Melel I indai ong komail, a pan kasapwilada i pon a dipisou karos.

⁴⁸ A ma ladu sued o pan lamelame nan mongiong i: Ai monsap pwapwand kodo;

⁴⁹ Ap kame a warok kan o nam o nim nan pung en me kamom sakau;

⁵⁰ Monsap en ladu o ap pan pwarado ni ran eu, me a sota lamelame o ni klok, me a sasa.

⁵¹ O a pan palang pasang i o katororalang i ren me malaun akan, iei wasan maiei o teterok.