¹ A LAO ran pasanger, samero lapalap akan o saumas akan en toun sap o kapukapungada duen Iesus pwen kamatala.

² Irail lao saliedi i, ap wawei, ki ong ren kopina Pontius Pilatus.

³ A Iudas, me pangala i lao kilanger me a pakadeikadar, en kamatala, ap kalukila o purekido moni sileisok ren samero lapalap akan o saumas akan.

⁴ Indada: Ngai me wiadar dip, ni ai pangalar nta makelekel. A irail inda: Menda re at? Koe en pein wia.

⁵ I ari kasedi moni ko nan im en kaudok, ap koieilar lusiamalar.

⁶ A samero lapalap akan ale moni ko indada; A sota pung kitail en ki ong nan deun mairong, pwe pwain pan nta.

⁷ Irail ari kapukapung, ap netiadar sap en saun wia dal, wasa me men liki pan seredi ia,

⁸ I me wasa o adaneki sap en nta kokodo lel ran wet.

⁹ I dokan a pwaidar, me lokidor ren saukop Ieremia, me masani: Irail ari aleer moni sileisok i pwaine pan i, me re netiada ren men Israel.

¹⁰ O pwaine kida sap en saun wia dal, duen me Kaun o kotin masani ong ia.

¹¹ Iesus ari kotikot mon kopina; kopina ap kainoma re a masani: Nanmarki en Sus akan komui? A Iesus kotin masani ong i: Komui me masani.

¹² Samero lapalap akan o saumas akan lao karaune kin i, a sota kotin sapeng.

¹³ Pilatus ap masani ong i: Komui sota rong duen ar karakarauni komui kaualap?

¹⁴ I ari sota kotin masani ong i meakot. Kopina ap poneponeki kaualap.

¹⁵ Ari, ni kamadip o kopina kin lapwa ong irail amen me salidi, meamen, me re mauki,

¹⁶ A i ansau o ol amen, ad a Parapas, me salidi re ’rail.

¹⁷ Irail lao pokon penaer, Pilatus ap masani ong irail: Is me komail mauki, i en lapwa dang komail, Parapas de Iesus, me maraneki Kristus?

¹⁸ Pwe a asaer, ar peirin, me re pang kilar i.

¹⁹ A lao kaipokedi pon deun kadeik, a paud ilokilang i indada: Komui der wia meakot ong ol pung men et, pwe i auramandar duen i, me i lokelokeki laud ran wet.

²⁰ A samero lapalap akan o saumas akan sairen kila pokon o, ar poekipoeki Parapas o kamatala Iesus.

²¹ A kopina sapeng masani ong irail: Is re ’ra, me komail mauki, i en lapwadang komail? Irail potoan ong: Parapas.

²² Pilatus ap masani ong irail: Da me i en wiaki Iesus, me maraneki Kristus? Irail karos potoan ong: A en kalopuela!

²³ A kopina masani: Pwe sued da, me a wiadar? A re kalaudela ar weriwer: A pan kalopuela!

²⁴ Pilatus lao kilang, me a sota kak wiada meakot, pwe moromorong pan wiaui, ap ale pil, omiom mo ’rail masani: Ngai makelekel sang ntan ol pung men et, komail pan wia.

²⁵ Aramas karos ap wiaki eu sapeng indada: Nta en kapokon ong kit o nait seri kan!

²⁶ A ap lapwa dong irail Parapas, a Iesus me a woki ap mueid ong irail, en kalopuela i.

²⁷ Nain kopina saunpei kan ap ale Iesus kalualong ong nan im en kadeik o, ap kapokon pena saunpei karos;

²⁸ Irail ap ki sang i sapwilim a likau kan, ap id kalikauwie kida i likau waitata;

²⁹ Ap pada al en tek eu, ap kida pon kadokenmai, o ki ong sokon apot ni lim a maun, o kelepukidi mo a o kapikapidi i indada: Iong Nanmarki en Sus akan!

³⁰ Irail kondipe ong i, o re ale sokon o, o pokieki kadokenmai.

³¹ Irail lao kapiti i, ap kisang likau waitata, ap kapure ong i udan sapwilim a likau o kaluawei, pwen kalopuela.

³² Ni arail kotikot kokola, rap diarada aramas en Kirene men, me ad a Simon, i me re iton ong, en wadala sapwelim a lopu.

³³ Irail lao lel ong wasa o, me ad a Kolkata, iet wewe: Wasa en pondal en monga.

³⁴ Irail ki ong i pinika, me doleki edi. A lao kotin song kis, a sota urak.

³⁵ Irail lao kalopuelar i, ap nek pasang sapwilim a likau kadoropwe kidar.

³⁶ Irail ari mondi ong wasa o masamasan i.

³⁷ O ponangin kadokenmai re pasuredier inting o, me a pukoki: Iet Nanmarki en Sus akan.

³⁸ Lolap riamen iang i lopuelar, amen mi ni pali maun, a amen ni pali maing.

³⁹ Me dadaulul akan lalaue i, dueduälok.

⁴⁰ Katiti: Koe me kin kawela im en kaudok ap id kauada pong sili pong, en pein dore uk ala; ma Sapwilim en Kot koe, en keredi sang nin lopu en!

⁴¹ A samero lapalap, o saunkawewe, o saumas akan pil dueta kapikapiti i indada:

⁴² A dorelar akai, ap sota kak dorela pein i; ma i Nanmarki en Israel, i en keredi sang ni lopu en, a kitail pan kamelele i.

⁴³ A liki Kot, i en kotin dorela, ma a kotin kupura i, pwe a indada: Ngai Sapwilim en Kot.

⁴⁴ Lolap oko, me iang i lopuelar, pil lalaue i.

⁴⁵ Sang ni auer kawonu lel auer kaduau rotorot kipadi sap o.

⁴⁶ Ni auer kaduau Iesus ap kotin ngil laud masani: Eli, eli lama asaptani! Iet wewe: Ai Kot, ai Kot, da me komui likitmalia kin ia la?

⁴⁷ Akai me u wasa o, rongadar me, ap indada: A eker Elias.

⁴⁸ A amen irail pitipit tang ale lim eu, kaduedi ong nan pinika kauong ni alek apot, kidang i en urak,

⁴⁹ A akai me inda: Iermen, kitail en kilang mas, ma Elias pan pwarado dorela i.

⁵⁰ Iesus pil kotin ngil laud, ap kadarala ngen e.

⁵¹ A kilang, perepa likau en im en kaudok o ap dei pasang, sang pali poa lel pa, o sap rereda, o paip akai rongkilar,

⁵² O sousou kai sara pasang, o war en me saraui kan toto, me mamair, ap iasadar.

⁵³ O murin ar iasadar, irail koda sang nan sousou kan, kolang kanim saraui, pwara dong me toto.

⁵⁴ Senturion o me iang i sinsila Iesus, kilanger sap a rereda, o meakan, me wiauier, rap masakadar kaualap, katiti: Melel i, me Sapwilim en Kot!

⁵⁵ O li toto mi kailewei, kilekilang me wiaui, iei irail, me idauendo Iesus sang Kaliläa papa i.

⁵⁶ Maria men Makdala, o Maria in en Iakopus i Ioses, o in en nain Sepedäus akan mi nan pung arail.

⁵⁷ A lao sautik penaer, ol kapwapwa men pwarado, men Arimatia, me ad a Iosep, me pil tounpadak en Iesus amen.

⁵⁸ I ari poto dong Pilatus poeki kalep en Iesus. Pilatus ap masani, a en pangalang i.

⁵⁹ Iosep ari ale kalep o, kidimiki pena likau makelekel o kaselel;

⁶⁰ Ap nekidedi nan pein a sousou kap, me a weiradar nan paip; i ap kadapure ong takai kalaimun eu nan au en sousou o, ap kotila sang,

⁶¹ A Maria men Makdala, o Maria teio momod sal ong sousou o.

⁶² A mandan ran o, ran en kaonop, samero lapalap o Parisär akan pokon pena ren Pilatus.

⁶³ Indada: Maing, kit tamandar, me ol sued men et katitiki ni a memaur: I pan maureda murin ran silu.