¹ ויהי לפנות הבקר ויתיעצו כל ראשי הכהנים וזקני העם על ישוע להמיתו׃

² ויאסרו אתו ויוליכהו משם וימסרהו אל פונטיוס פילטוס ההגמון׃

³ וירא יהודה המסר אותו כי הרשיעהו וינחם וישב את שלשים הכסף אל הכהנים הגדולים והזקנים לאמר׃

⁴ חטאתי כי דם נקי הסגרתי והם אמרו מה לנו ולזאת אתה תראה׃

⁵ וישלך את הכסף אל ההיכל ויפן וילך ויחנק׃

⁶ ויקחו ראשי הכהנים את הכסף ויאמרו לא נכון לנו לתתו אל ארון הקרבן כי מחיר דמים הוא׃

⁷ ויתיעצו ויקנו בו את שדה היוצר לקבורת הגרים׃

⁸ על כן שם השדה ההוא שדה הדם עד היום הזה׃

⁹ אז נתמלא מה שנאמר ביד ירמיה הנביא ויקחו שלשים הכסף אדר היקר אשר יקר מעל בני ישראל׃

¹⁰ ויתנו אתם אל שדה היוצר כאשר צוני יהוה׃

¹¹ וישוע העמד לפני ההגמון וישאלהו ההגמון לאמר האתה הוא מלך היהודים ויאמר ישוע אתה אמרת׃

¹² וידברו עליו שטנה הכהנים הגדולים והזקנים והוא לא ענה דבר׃

¹³ ויאמר אליו פילטוס האינך שמע כמה הם מעידים בך׃

¹⁴ ולא ענהו אף דבר אחד ויתמה ההגמון עד מאד׃

¹⁵ ומנהג ההגמון היה לפטר לעם בכל חג אסיר אחד את אשר יחפצו׃

¹⁶ ובעת ההיא היה להם אסיר ידוע ושמו בר אבא׃

¹⁷ ויהי כאשר נקהלו ויאמר אליהם פילטוס את מי תחפצו כי אפטר לכם את בר אבא או את ישוע הנקרא בשם משיח׃

¹⁸ כי ידע אשר רק מקנאה מסרו אתו׃

¹⁹ ויהי כשבתו על כסא הדין ותשלח אליו אשתו לאמר אל יהי לך דבר עם הצדיק הזה כי בעבורו עניתי הרבה היום בחלום׃

²⁰ והכהנים הגדולים והזקנים פתו את המון העם לשאל להם את בר אבא ולאבד את ישוע׃

²¹ ויען ההגמון ויאמר אליהם את מי משניהם תחפצו כי אפטר לכם ויאמרו את בר אבא׃

²² ויאמר אליהם פילטוס ומה אעשה לישוע הנקרא בשם משיח ויענו כלם יצלב׃

²³ ויאמר ההגמון מה אפוא הרעה אשר עשה ויוסיפו עוד צעק לאמר יצלב׃

²⁴ ויהי כראות פילטוס כי לא יועיל מאומה ורבתה עוד המהודה ויקח מים וירחץ את ידיו לעיני העם ויאמר נקי אנכי מדם הצדיק הזה אתם תראו׃

²⁵ ויענו כל העם ויאמרו דמו עלינו ועל בנינו׃

²⁶ אז פטר להם את בר אבא ואת ישוע הכה בשוטים וימסר אותו להצלב׃

²⁷ ויקחו אנשי הצבא אשר להגמון את ישוע ויביאהו אל בית המשפט ויאספו עליו את כל הגדוד׃

²⁸ ויפשיטו אותו את בגדיו ויעטפהו מעיל שני׃

²⁹ וישרגו קצים ויעשו עטרת וישימו על ראשו וקנה בימינו ויכרעו לפניו ויתלוצצו בו לאמר שלום לך מלך היהודים׃

³⁰ וירקו בו ויקחו את הקנה ויכהו על ראשו׃

³¹ ואחרי התלוצצם בו הפשיטו אותו את המעיל וילבישהו את בגדיו ויוליכהו לצלב׃

³² ויהי בצאתם וימצאו איש קוריני ושמו שמעון ויאנסו אתו לשאת לו את צלבו׃

³³ ויבאו אל המקום הנקרא גלגלתא הוא מקום גלגלת׃

³⁴ ויתנו לו לשתות חמץ מזוג במרורה ויטעם ולא אבה לשתות׃

³⁵ ויהי כאשר צלבו אותו ויחלקו להם את בגדיו וגורל הפילו למלאת את אשר נאמר בפי הנביא יחלקו בגדי להם ועל לבושי יפילו גורל׃

³⁶ וישבו שמה וישמרו אותו׃

³⁷ וישימו את דבר אשמתו כתוב ממעל לראשו זה הוא ישוע מלך היהודים׃

³⁸ ויצלבו אתו שני פריצים אחד לימינו ואחד לשמאלו׃

³⁹ והעברים גדפו אותו ויניעו את ראשם׃

⁴⁰ ויאמרו אתה ההרס את ההיכל ובנהו בשלשת ימים הושע לנפשך ואם בן האלהים אתה רדה מן הצלב׃

⁴¹ וכן הלעיגו גם ראשי הכהנים עם הסופרים והזקנים לאמר׃

⁴² את אחרים הושיע ולעצמו לא יוכל להושיע אם מלך ישראל הוא ירד נא עתה מן הצלב ונאמין בו׃

⁴³ בטח באלהים עתה יפלטהו אם חפץ בו כי אמר בן האלהים אני׃

⁴⁴ וגם הפריצים הנצלבים אתו חרפהו כדברים האלה׃

⁴⁵ ומשעה הששית היה חשך על כל הארץ עד השעה התשיעית׃

⁴⁶ וכעת השעה התשיעית ויצעק ישוע בקול גדול אלי אלי למה שבקתני ותרגומו אלי אלי למה עזבתני׃

⁴⁷ ויאמרו מקצת העמדים שם כשמעם את זאת לאמר אל אליהו הוא קורא׃

⁴⁸ וימהר אחד מהם וירץ ויקח ספוג וימלא אתו חמץ וישימהו על קנה וישקהו׃

⁴⁹ ושאר האנשים אמרו הניחו לו ונראה אם יבוא אליהו להושיעו׃

⁵⁰ וישוע הוסיף לקרא בקול גדול ותצא רוחו׃

⁵¹ והנה נקרעה פרכת ההיכל מלמעלה למטה לשנים קרעים והארץ נרעשה והסלעים נבקעו׃

⁵² והקברים נפתחו ורבים מגופות הקדושים ישני אדמת עפר נעורו׃

⁵³ ויצאו מן הקברים אחרי הקיצו ויבאו אל העיר הקדושה ויראו לרבים׃

⁵⁴ ושר המאה והאנשים אשר אתו השמרים את ישוע כראותם את הרעש ואת אשר נהיתה נבהלו מאד ויאמרו אכן זה היה בן אלהים׃

⁵⁵ ותהיינה שם נשים רבות הראות מרחוק אשר הלכו אחרי ישוע מן הגליל לשרתו׃

⁵⁶ ובתוכן מרים המגדלית ומרים אם יעקב ויוסי ואם בני זבדי׃

⁵⁷ ויהי בערב ויבא איש עשיר מן הרמתים ושמו יוסף וגם הוא היה מתלמידי ישוע׃

⁵⁸ ויגש אל פילטוס לשאל את גוית ישוע ויצו פליטוס כי תנתן לו׃

⁵⁹ ויקח יוסף את הגויה ויכרך אותה בסדין טהור׃

⁶⁰ וישימה בקבר החדש אשר חצב לו בסלע ויגל אבן גדולה על פתח הקבר וילך לו׃

⁶¹ ומרים המגדלית ומרים האחרת היו ישבות שם ממול הקבר׃

⁶² ויהי ממחרת ערב השבת ויקהלו הכהנים הגדולים והפרושים אל פילטוס׃

⁶³ ויאמרו אדנינו זכרנו כי אמר המתעה ההוא בעודנו חי מקצה שלשת ימים קום אקום׃